Аан дойдуга кырдьаҕастар күннэрэ.
Аан дойду кырдьаҕастарын күнэ — алтынньы 1 күнүгэр 1991 сылтан ыла бэлиэтэнэр. ХНТ Генеральнай Ассамблеятын 45-с сиэссийэтигэр ахсынньы 14 күнүгэр 1990 сыллаахха быһаарыныы ылыллыбыт. Онтон Саха сиригэр биһиги бастакы президеммит М.Е.Николаев 1991 сыллаахха алтынньы 1 күнүн кырдьаҕастар күннэринэн биллэрбитэ.
Киһи кырдьыытын көмүс күһүнү кытта дьүөрэлииллэр. Ол да иһин алтынньы 1 күнүн — күһүн оройун — Аҕам саастаахтар күннэринэн анаабыттар. Кырдьаҕастар Аан дойдутааҕы күннэрэ ытыктабыл уонна үгэс эрэ быһыытынан бэлиэтээһин буолбакка, аҕа көлүөнэ дьонугар күннэтэ ахсаабат болҕомто, истиҥ кыһамньы уурарбытын санатар ытык күн буолар.
Бу күн эбэн саастаах дьоммутугар анаан Фольклор дьиэтэ бырааһынньыктааҕы тэрээһин ыытта. Аҕам саастаах дьоммутун нэһилиэк баһылыга Лебедев Константин Иннокентьевич эҕэрдэлээтэ, кырдьаҕастар салайааччыларыгар сэмэй бэлэхтэрин туттартаата.
Олохтоох модельнай библиотека сэбиэдиссэйэ Васильева Дияна Терентьевна бэйэтин эҕэрдэтин тиэртэ. Нэһилиэк аҕам саастаахтарыттан «Бастыҥ ааҕааччы» — Данилова Татьяна Андреевнаҕа, «Аҕам саастаах ааҕааччы» — Еремеева Варвара Константиновнаҕа анал ааттары туттартаата.
Ону тэҥэ оскуола үөрэнэччилэрин Мичийээнэ үҥкүү ансамбла (сал. Миронова Л.И.), Мичээр вокальнай ансамбла (сал.Иванов Р.Р.) бэйэлэрин эҕэрдэ нүөмэрдэрин көрдөрөн, ытык саастаах дьоммутун сэргэхситтилэр.
Ол кэннэ Фольклор дьиэтин үлэһиттэрэ, олохтоох библиотекарь, уонна Чакыр нэһилиэгин кырдьаҕастарын бэрэсэдээтэлэ Оконешникова Прасковья Васильевна бэйэлэрин викториналарын, ырыаларын-тойуктарын, толкуй оонньууларын ыытан Аҕам саастаах дьоммутугар биир умнуллубат күнү бэлэхтээтибит. Эбээлэрбит, эһээлэрбит оҕолуу оонньоон, күлэн-үөрэн сэргэхсийэн, күннээҕи түбүктэрин умнан, үҥкүүлээн-ыллаан, сынньанан, күннэрин бэккэ атаардылар.
Баҕарыа этибит күндү дьоннорбутугар мэлдьи бу курдук эрчимнээхтик, көхтөөхтүк үөрэ-көтө сылдьаргытыгар, дьиэҕитигэр уоккутугар сылаас, сымнаҕас сыһыаны. Өссө да элбэх минньигэс сиэннэри, хос сиэннэри. Тиит мас курдук чиргэл доруобуйаны, нус-хас дьоллоох, дьоһуннаах олоҕу!
