50 сыл бииргэ
2024 сыл Россияҕа Дьиэ кэргэн сыла бэлиэтэннэ. Биһиги нэһилиэккэ 50 сыл устата истиҥ иэйии тапталга куустаран, 50 сыл дьоллоох, күн күбэй күндү ийэ, сайаҕас эбээ, аҕалаатар аҕа, күндү эһээ аатын ааттатан, 50 сыл кэнчээри ыччат, оҕо, сиэн дьолун билбит саамай убаастыыр дьоммут Тамара, Софрон Михайловтар ыал буолан олорбуттара оруобуна 50 сыл буолла.
50 сыл анараа өттүгэр алтынньы 18 күнүгэр 1974 с. Чакыр нэһилиэгэр Михайловтар диэн саҥа дьиэ кэргэн төрүттэммитэ. Сэтинньи 18 күнүгэр, Ыыстаахха Маайа, Баһылай Михайловтар уһаайбаларыгар уруу дьоро киэһэтэ тэриллибитэ. Ол кэмтэн номнуо 50 сыл ааһа охсубут. Михайловтар иллээх дьиэ кэргэн үс кыыс оҕону кынаттаан көтүтэн, билигин үс сиэннээхтэр. Улахан кыыс Татьяна Софроновна ийэтин курдук үүтү астыыр собуот маастара, икки кыыс Розалия уонна Надежда бэйэлэрэ фотостудия тэринэн ситиһиилээхтик үлэлии сылдьаллар. Сиэннэрэ Кэскил СВФУ устудьуона, хабылыгынан, хаамысканан утумнаахтык дьарыктанар, хабылыкка республика маастара, Дайаана СВФУ ИЗФиР устудьуона, Күннэй Якутскайдааҕы 3 № оскуола 8 – с кылааһын үөрэнээччитэ.
Михайловтар үлэни өрө туппут ыал. Улуустарын, нэһилиэктэрин сайдыытыгар бэйэлэрин сэмэй кылааттарын укпуттара саарбаҕа суох. Ол туоһута, дьиэ кэргэн аҕа баһылыга Софрон Васильевич нэһилиэк, улуус бочуотунай грамоталарынан наҕараадаламмыта. Үлэ бэтэрээнэ. Өр сылларга “Кылыһах” фольклорнай ансамбль чилиэнэ буолан Саха сирин улуустарынан сылдьан конкурстарга кыттыталаан, дипломант, лауреат ааттарын сүкпүтэ. Дьиэ кэргэн Далбар Хотуна Тамара Николаевна 40 – ча сыл Чакырдааҕы үүтү тутар собуокка маастарынан үлэлээн, Саха Өрөспүүбүлүкэтин тыатын хаһаайыстыбатын министиэристибэтиттэн махтал сурук, улуус тыатын хаһаайыстыбатын, нэһилиэк үгүс элбэх грамоталарынан, махтал суруктарынан наҕараадаламмыта, үлэ бэтэрээнэ.
Тамара Николаевна, Софрон Васильевич нэһилиэгин дьонуттан убаастабылы ылыахтарын ылаллар, эдэр көлүөнэҕэ дьиэ кэргэн холобура буолаллар. Быйыл ахсынньы 13 күнүгэр 2024 сылга Михайловтар дьиэ кэргэн Саха Өрөспүүбүлүкэтин «Семейная доблесть» бэлиэ хаһаайыттара буоллулар. Саха Өрөспүүбүлүкэтин бырабыытылыстыбатын Загсыттан «Кыһыл көмүс сыбаайба» сибидиэтилистибэтэ туттарылынна. Ытык дьоммутугар баҕарабыт ыраас халлааны, чугас дьоҥҥут сылаас сыһыаннарыгар уйдаран этэҥҥэ чэгиэнник сылдьаргытыгар, аал уоккут унаар буруота уһун үйэлэргэ унаара турдун!
