«Мин Сахам сирэ – 21 үйэҕэ» Үтүө дьыала хамсааһына үбүлөйдээх 25 сыла
«Үтүө дьыала» хамсааһын саҕаланыыта өрөспүүбүлүкэ историятын биир кэрэ-бэлиэ кэрдиис кэмэ. 1999 с. Мэҥэ Хаҥалас улууһун дьаһалтата “Улуус 70 сылын көрсө — 70 эбийиэги!” диэн ыҥырыы таһаарбыта. Өрөспүүбүлүкэ Бэрэсидьиэнэ Михаил Николаев Майаҕа тахса сылдьан ону бэркэ биһирээбитэ, оттон атын улуустар хаба тардан ыланнар, бу көҕүлээһини бэйэлэригэр киллэрбиттэрэ. Ити курдук, “2000 сылга – 2000 үтүө дьыала” хамсааһын саҕаламмыта, анал дириэксийэ тэриллэн, салайааччынан Иннокентий Егорович Бочкарев анаммыта. 2003 с. Бырабыыталыстыба Бэрэссэдээтэлэ Егор Афанасьевич Борисов норуот көҕүлээһинэ бүддьүөттэн өйөнүөхтээх диэн дьаһал таһааран, “Үтүө дьыала” хамсааһынын Судаарыстыбаннай сакаасчыт сулууспатын иһинэн киллэртэрбитэ. Иннокентий Егорович Уус Алдан улууһун баһылыгынан талыллыаҕыттан, салайааччынан Иван Софронович Емельянов анаммыта. 2023 сылтан Алексей Дмитриевич Петров үлэлиир.
Бу хамсааһын өрөспүүбүлүкэ улуустарыгар үлэҕэ көхтөөх энтузиаст дьон уонна былаас түмсүүлэрин чаҕылхай холобурунан буолбута.
Норуот хамсааһына – модун күүс. Хас биирдии нэһилиэккэ, улууска үлэ барбыта. Дьон-сэргэ олорор нэһилиэктэригэр туох эбийиэк ордук наадалааҕынан көрөн, нэһилиэктэрэ сайдарын туһугар бары биир сомоҕо буолан туруммуттара.
Билиҥҥи кэмҥэ бэлиэтээн көрөр буоллахха, биһиги нэһилиэккэ “Үтүө дьыала” объектара: спортивнай саал, уһуйаан дьиэтэ, почта, АТС дьиэлэрэ, ФАП, оскуола мастырыскыайа, учууталлар 2 кыбартыыралаах уопсай дьиэлэрэ дьэндэспиттэрэ.
Нэһилиэккэ ол саҕана баһылыктаабыт Афанасий Михайлович Кириллин маннык ахтар: “Спортзал тутуутугар эдэр ыччат уолаттарбыт армияттан кэлэн кыра хамнаска патриоттаан үлэлээбиттэрэ. Улуус баһылыга Шадрин Алексей Алексеевич өйөөбүтэ. Филиппов Иннокетий Алексеевич мин оннубар баһылыктаан заалы ситэрбиппит, салҕыы детсады туппуттара. Спортзал аһыллыытыгар вице — президент Александр Константинович Акимов кэлэн барбыта.
Биирдиилээн нэһилиэк дьоно харчынан, үүт туттарбыт харчынан, “Тураҥнаах” б/х салайааччыта Софронов Николай Петрович уу харчынан 10000 солк.көмөлөспүтэ оччолорго элбэх суумма этэ. Михайлов Алексей Васильевич уруһуйдаан оформление оҥорбута. Биир дойдулаахпыт “Чакыр” түмсүү салайааччыта Карпов Вячеслав Павлович тренажердарынан, теннис остуолунан көмөлөспүтэ. Адамов Михаил Иннокентьевич заал тутуутугар общественнай хонтуруол буолбута”.
«Мин Сахам сирэ – 21 үйэҕэ» Үтүө дьыала хамсааһына үбүлөйдээх 25 сылынан биһиги нэһилиэктэн бу хамсааһыҥҥа кылаатын иһин Васильев Дмитрий Дмитриевич Ил Дархан үрдүк наҕараадатын Бочуотунай грамота ылар чиэскэ тигистэ.
Онон бу хамсааһын тэриллэн үлэлээбитэ 25 сылыгар барда. Биллэн турар, ханнык баҕарар хамсааһын ким эрэ көҕүлээһининэн, тэрийиитинэн, сылтан сыл өссө сайдан күн бүгүҥҥэ диэри салҕанан бара турар.
