Ыам ыйын 8 күнэ — Улуу Кыайыы 81 сыла
Ыам ыйын 8 күнүгэр биһиги нэһилиэкпитигэр Улуу Кыайыы 81 сылын уруйдаан-айхаллаан көрүстүбүт. Үөрэнээччилэр, улахан дьон – бары үөрэ-көтө кыттыыны ыллыбыт.
Тэрээһин сэлэлээн хаамыыттан саҕаланна. Нэһилиэк олохтоохторо, оскуола үөрэнээччилэрэ «Өлбөт үйэлээх полк» аахсыйаҕа кыттан, Улуу Кыайыыны уһансыбыт чугас дьоннорун мэтириэттэрин тутан хаамтылар. Онтон Кыайыы күнүгэр аналлаах митинг — бу Улуу Кыайыыны уһансыбыт, сэрии толоонугар охтубут буойуттары кэриэстээһин, кинилэр ааттарын үйэтитии, тыыннаах хаалбыт бэтэрээннэргэ сүгүрүйүү улахан тэрээһин «Кыайыы памятнигар» буолан ааста. Бу күн дьон-сэргэ сэрии сылларын ахтан ааһар, эйэлээх олоҕу арчылыыр, Георгиевскай лиэнтэлэри кэтэн Улуу Кыайыыны бэлиэтээтибит.
Төһө да тымныы күн турдар, Улуу Кыайыы күнэ киэҥ далааһыннаахтык буолан ааста.
Киэһээтин Р.А.Филиппов аатынан фольклор дьиэтигэр олохтоох библиотека тэрээһининэн, сэрии кэмин сырдатар кинигэлэринэн быыстапка турда.
Сэрии, үлэ бэтэрээнэ, «Ытык Аҕа» бэлиэ хаһаайына, Чакыр нэһилиэгин бочуоттаах олохтооҕо Адамов Константин Николаевич туһунан кинигэ сүрэхтэннэ, быыстапка турда. Кинигэ ааспыт сэрии ыар сылларын, бэтэрээн туһунан кэлэр көлүөнэҕэ тиэрдэр, үйэтитэр сүдү суолталаах үлэ буолар. Кинигэ ааптара Константин Николаевич Адамов улахан сиэнэ Егорова Виктория Павловна буолар. Бу тэрээһиҥҥэ бэтэрээн оҕолоро аҕаларын ахтан-санаан аастылар, кинигэ тула истиҥ кэпсэтии буолла.
Түөлбэлэр икки ардыларыгар «Битва ансамблей» күрэх, эҕэрдэ нүөмэрдэр ыытылыннылар. Күрэх кыайыылаахтарынан «Алгыс» түөлбэ (салайааччы Михайлова М.А.) ааттанна.
Улуу Кыайыы 81 сылыгар аналлаах тэрээһиммит, бүтүн дойдубут үрдүнэн ыытыллар Аҕа дойдуну көмүскүүр сэриигэ охтубуттары кэриэстиир «ӨЙДӨБҮННЬҮК ЧҮМЭЧИ» патриотическай акциянан түмүктэннэ.
Ким да умнуллубат, туох да умнуллубат! Барыгытын Улуу Кыайыы күнүнэн эҕэрдэлиибит!