М.К.Кириллин «Чакырдар Аҕа дойду сэриитигэр» кинигэтин биһирэбилэ
Бэс ыйын 13 күнүгэр Е.А.Борисов аатынан киин бибилэтиэкэҕэ Чурапчы улууһун Чакыр нэһилиэгин Аҕа дойду сэриитин (1941-1945) кыттыылаахтарын туһунан сэһэргиир «Чакырдар Аҕа дойду сэриитигэр» диэн кинигэ биһирэбилэ буолан ааста.
Кинигэни хомуйан оҥордо Михаил Капитонович Кириллин сиэнэ “Барҕарыы” фонд дириэктэрин солбуйааччы, тыл билимин хандьыдаата Мария Афанасьевна Кириллина.
М.А.Кириллина кинигэ хайдах оҥоһуллубутун,ааптар хоһооннордоох тэтэрээттэрин,саллааттар суруктарын, Михаил Капитонович бу кинигэ рукопиһын 3 экземплярынан оҥорон хаалларбытын туһунан сырдатта. М.Е.Филиппова кинигэҕэ киирбит буойуннар тустарынан слайдаҕа көрдөрөн кэпсээтэ. В.К.Еремеева абаҕата Еремеев К.Е.-II бу кинигэҕэ киирбитин, кини сэрии иннинэ илиинэн ырыанньыгы суруйбутун туһунан иһитиннэрдэ. Ааҕааччыны кытта үлэлиир салаа сэбиэдиссэйэ М.Н.Кузьмина кинигэ ис тутулун ырытта.
Уонна кэлбит аймах-билэ дьоно ахтан-санаан аастылар.
Тэрээһини иилээн-саҕалаан ыыттылар Россия Бочуоттаах тутааччыта, Саха Өрөспүүбүлүкэтин үтүөлээх тутааччыта, Чурапчы улууһун бочуоттаах олохтооҕо Афанасий Михайлович Кириллин уонна кини төрөппүт кыыһа Мария Афанасьевна Кириллина.
Түмүгэр кэлбит ыалдьыттарга, кинигэ тахсарыгар күүс-көмө буолбут дьонноругар, Е.А.Борисов аатынан киин бибилэтиэкэҕэ барҕа махталларын тиэртилэр.
Онтон бэс ыйын 18 күнүгэр бу кинигэ биһирэбилэ дойдутугар Чакыр нэһилиэгэр ыытылынна.
Сэһэргэһиини кыраайы үөрэтээччи Филиппова М.Е., уонна А.М.Кириллин ыыттылар. Михаил Капитонович хос сиэннэрэ кинихоһооннорун, суоллааҕы бэлиэтээһиннэрин аахтылар. Олохтоох бибилэтиэкэ сэбиэдиссэйэ Михайлова С.Р. Чакыр оскуолатын оҕолоро научно — практическай конференцияларга кытталларыгар бу кинигэни туһанан аахпыт дакылааттарын билиһиннэрдэ. Филиппова М.Е. нэһилиэк олохтоохторо кыайыыга кылааттарын туһунан кэпсээтэ. 8 кылаас үөрэнээччитэ Егорова Күөрэгэй быйыл 100 сылын туолбут хос эһээтин Көстөкүүн Адаамап туһунан иһитиннэрдэ. Кэпсэтиигэ Чакыр олохтоохторо С.В.Михайлов, М.И. Ширяева, оскуола дириэктэрэ Неустроева А.В.кытыннылар. Түмүккэ кэлбит ыалдьыттар Кириллин М.К. дьонугар бу туһалаах кинигэни таһаарбыттарыгар махтал тылларын эттилэр.
