Сэргэх тэрээһин
Сэтинньи 16 күнүгэр нэһилиэкпитигэр сэргэх тэрээһин буолла. 47 сыл биэссэрдээбит Тарасова Капитолина Константиновнаны уонна 38 сыл акушеркалаабыт Филиппова Александра Афанасьевна бочуоттаах сынньалаҥҥа атаарыы киэһэтэ тэрилиннэ. Бу маҥан халааттаах аанньалларбыт өрөбүл күнү, бырааһынньыгы аахсыбакка суһал көмөҕө сылдьан, тыа сирин луохтуурдарын бүппэт түбүгүн эҥкилэ суох, бэриниилээхтик үлэлээн дьон — сэргэ махталын ылыахтарын ылбыттара.
Капитолина Константиновна Амурскай уобалас Тында оройуонун Усть — Нюкша бөһүөлэгиттээн төрүттээх. Александра Афанасьевна Кэбээйи Арыктааҕар төрөөбүт. Кинилэр иккиэн медучилищены бүтэрээт Чакырга ананан кэлэн быйылгы дьылга дылы бэйэлэрин үлэлэрин чиэстээхтик толороннор, кинилэргэ анаан бу күн нэһилиэк олохтоохторуттан барҕа махтал, үгүс үтүө тыллара, алгыстара этилиннэ.
