Эрилик декадата түмүктэннэ
Тохсунньу 24 күнүттэн олунньу 2 күнүгэр С.С. Яковлев — Эрилик Эристиин 132 сылыгар аналлаах декада ыытылынна.
Декада чэрчитинэн «Ааҕааччы түүнэ», Эрилик Эристиин олоҕор, айар үлэтигэр аналлаах кылаас чаастара, «Ыал уонна оҕо саас» үөрэнээччилэргэ аналлаах уруһуй күрэҕэ, «Эрилик ааҕыылара» научно — практическай конференция, кылаастарынан остуол оонньуутун күрэҕэ уонна декаданы Эрилик Эристиин «Кэриэс туолуута» сэһэнинэн ааҕааччы конференцията ыытылынна.
Биһиги нэһилиэк киэн туттар киһибит саха билиҥҥи литературатуратын төрүттээччилэртэн биирдэстэрэ, биллиилээх олоҥхоһут, классик — суруйааччы, маҥнайгы романист, публицист, сахалартан биир бастакынан нууччалыы тылбаастанан, дойдуга киэҥник биллибит айымньылардаах С.С.Яковлев — Эрилик Эристиин олоҕор, айар үлэтигэр аналлаах дьаһаллар сылын аайы буолаллара үгэскэ кубулуйда. Быйлгы сылга чуолаан кини «Кэриэс туолуута»сэһэнин куолаан ааҕыы түмүгэр ааҕааччы конференцията, бу сэһэнинэн дьиэ кэргэн кыттыылаах бэрт сэргэх квест — оонньуу ыытылынна.
