Аҕа дойду көмүскээччилэрин күнэ бэрт сэргэхтик ааста.
Олунньу ый 23 күнэ биһиги нэһилиэккэ бэрт сэргэхтик ааста. Күнүс 2 чаастан Никандр Федоров — Эр Санаа Ох — Хотой режиссердаах көҥүл тустууга ССРС оҕолорго бастакы чемпиона, биһиги биир дойдулаахпыт Вячеслав Карпов туһунан «Хапсыһыы» киинэтин көрүү Чакыр нэһилиэгиттэн саҕаланна. Саала иһэ толору киһи киинэни сэргээн көрдүлэр. Киинэ кэнниттэн устар бөлөҕү кытта көрсүһүү буолла. Киинэни көрбүт дьон санааларын эттилэр, итэҕэстэри ыйдылар. Эдэр режиссерга ситиһиини баҕардылар.
Нэһилиэккэ быйылгы сыл Аҕа сылынан биллэриллибитэ. Ол чэрчитинэн Аҕа сылын бэлиэтин оҥорууга уруһуй конкурса ыытылынна. Бу күн Аҕа сылын үөрүүлээхтик аһыы ыытылынна. Аҕа сылын бэлиэтин кыайыылааҕынан Сазонов Михаил буолла уонна 3 тыһ. харчынан наҕараадаланна.
Аҕа дойду көмүскээччилэрин күнүгэр анаан сылын аайы тэриллэр эр дьон икки ардыгар күрэхтэр ыытылыннылар уонна бу күн түмүк таҕыста. Кыайыылаахтар сыаналаах бириистэринэн наҕараадаланнылар. Ол кэнниттэн эмиэ сылын аайы эр дьон тэрээһининэн ыытыллар «Регул — мото» суперпризтаах лотерея оонньонно. Мотоцикл хаһаайынынан Филиппова И.Н. буолла.
