Оскуола түмүктүүр дьаһаллара
2023-2024 үөрэх дьылын түмүктүүр дьаһаллара буолан аастылар. Ол курдук ыам ыйын 22 күнүгэр — Тиһэх чуораан чугдаарда. Быйылгы үөрэх дьылыгар оскуола боруогун 3 оҕо бүтэрдэ. Үс уолга эҕэрдэ, алгыс тыллар этилиннилэр. Ыам ыйын 24 күнүгэр — оскуола отчуоттуур концера буолла. Бу тэрээһиҥҥэ оскуола салалтата үөрэххэ, үлэҕэ сыл бастыҥнарын ааттаталаата, номинациялар, стипендиялар туттарылыннылар. Бу киэһэ оҕолор сэргэх концертарынан түмүктэннэ. Ыам ыйын 25 күнүгэр суруйааччылар даачаларыгар оскуола оҕолорун уйгу- быйаҥ ыһыаҕа ыһылынна. Кылаастар тус туһунан түһүлгэнэн түһэн сандалы остуолларыгар сахалыы ас арааһын тартылар, Бу күн Саха сиригэр оһуохай күнэ этэ. Онон бу тэрээһин оҕолор ыһыаҕын кытта дьүөрэлэһэн кылаастарынан оһуохай этээччилэр күрэхтэрэ буолла. Алын сүһүөхтэртэн саҕалаан үрдүкү кылаастар оһуохайдаан ойдулар, эһиэкэйдээн тэйдилэр. Ыһыах сэргэх түгэнинэн оҕолор спорт араас көрүҥнэригэр күрэхтэһиилэрэ буолла. Ити курдук 2023-2024 үөрэх дьыла түмүктэннэ. 9,11 кылаас оҕолоругар биир кэлим экзаменнарын этэҥҥэ ааһалларыгар баҕарыаҕыҥ!
