Муус устар 19 күнэ — Пионерия күнэ
Советскай Союзка хас биирдии оскуолаҕа пионерскай тэрилтэ баара. Хас биирдии кылаас бэйэтэ туспа пионерскай этэрээт буолара. Этэрээт командирын пионердар бэйэлэрэ талаллара. Этэрээт атын чилиэннэрэ бары эбээһинэстээх буолаллара, ким эрэ санинструктор, үөрэх сектора, спортсектор, культмассовик. Этэрээт үлэтин баһаатайдар тэрийэн ыыталлара.
1928 сыллаахха С.С. Яковлев-Эрилик Эристиин уонна учуутал Д.А.Васильева көҕүлээһиннэринэн, 1929 сыллаахха Толоон оскуолатыгар аан бастаан пионерскай тэрилтэ тэриллибитэ.Араас сылларга үлэлээбит пионер баһаатайдардарынан Флегонтова Екатерина Прокопьевна, Яковлева (Илларионова) Венера Егоровна, Филиппова Мария Егоровна, Петрова Антонина Петровна, Сивцева (Неустроева) Александра Васильевна буолаллар.
Үчүгэй үөрэхтэрин иһин пионерскай лааҕырдарга путевканан наҕараадаламмыт пионердар: Борисова Надежда Романовна – Бүтүн Сойуустааҕы «Артек» лааҕыр, 1980 с. , Филиппова Евдокия Николаевна – «Артек», 1983 с., Ефремова Варвара Ниолаевна – “Артек”, 1984 с., Еремеев Егор Константинович – Бүтүн Сойуустааҕы “Орленок” лааҕыр, 1968 с., Данилов Константин Петрович – “Орленок” лааҕыр, 1969 с. , Афанасьева Марина Николаевна – “Орленок” лааҕыр, 1974 с., Флегонтов Леонид Егорович – “Орленок” лаа5ыр, 1976 с., Григорьев Никита Николаевич – “Океан” лаа5ыр, 1989 с.
Эрилик Эристиин аатынан пионерскай дружина
1965 сыллаахха Яковлева Венера Егоровна, Флегонтова Екатерина Прокопьевна пионерскай үлэни бэрт сэргэхтик ыыппыттара. Оскуола оҕолоро социалистическай дойдулар, союзнай республикалар пионердарын кытта суруйсаллара. Араас тэрээһиннэр бөҕө ыытыллаллара. Ол курдук туристическай походтарга Уорҕаҕа тиийэ өтөхтөрүнэн сылдьан былыргы өбүгэлэрбит тутта сылдьыбыт сэптэрин – сэбиргэллэрин, малларын – салларын, таҥастарын – саптарын мунньаллара, төрөөбүт сирдэрин, дойдуларын үөрэтэллэрэ. Ленинскэй хос, С.С.Яковлев – Эрилик Эристииҥҥэ анллаах муннук республикаҕа биһирэнэн, Дьокуускайга научнай – практическай конференцияҕа дакылаат ааҕыллыбыта, республика радиотыгар интервью бэриллибитэ.
Петрова Антонина Петровна өр сылларга пионербаһаатайдыыр кэмигэр Эрилик Эристиин аатынан пионерскай дружина икки төгүл правофланговай дружина аатын сүгэр чиэскэ тиксибитэ. Пионерскай хостору көрүү – конкурска икки төгүл бастаан 1983 сыллаахха Володя Дубинин аатынан этэрээт Красноярскайга, 1984 сыллаахха Леня Голиков аатынан этэрээт Пятигорскайга күүлэйдээн кэлбиттэрэ. Антонина Петровна 1984 сыллаахха “Лучшему пионерскому вожатому” ЫБЛКС КК значоктарынан наҕараадаламмыта.
